Սուրբ Ծննդյան պահքի ընթացքում քաղդեա-կաթոլիկ բոլոր տաճարներում աղոթելու են Իրաքի Մոսուլ քաղաքը և Նինվեյի հովիտը իսլամիստ գրոհայիններից ազատագրելու, ինչպես նաև Իրաքում կրոնական փոքրամասնությունների իրավունքները հարգելու համար: Այս մասին ասված է Քաղդեա- կաթոլիկ եկեղեցու Պատրիարք Լուիս Ռաֆաել Սակոյի համայնքներին ուղղված ուղերձում: Պատրիարքը հավատացյալներին կոչ է անում աղոթել <<Իսլամական պետություն>> խմբավորման կողմից Իրաքի բռնազավթված տարածքների ազատագրման համար, ինչը հնարավորություն կտա տասնյակ հազարավոր փախստականներին տուն վերադառնալ: Նշենք, որ Մոսուլը մեծությամբ Իրաքի երկրորդ քաղաքն է: Իսլամիստ գրոհայինները քաղաքը գրավել են 2014 թվականի հունիսին: Իսկ օգոստոսին իսլամիստները զավթեցին Նինվեյի հովիտը, որի քաղաքներում և գյուղերում բնակվող տասնյակ հազարավոր քրիստոնյաներ` ասորիներ, քաղդեացիներ, սիրիա- յակովիտյաներ ստիպված էին փախչել և ապաստան գտնել հարևան երկրներում:
