Ռուսական լրատվամիջոցների տեղեկացմամբ` Դամասկոսում Ռուսաստանի դեսպանատանը տեղի ունեցած պաշտոնական ընդունելության ժամանակ Սիրիայի մուսուլման հոգևոր առաջնորդները Ռուսաստանի կառավարությանը շնորհակալություն էին հայտնել ահաբեկչության դեմ պայքարում Սիրիային օգնելու համար և Սիրիայի նախագահ Բաշար Ասադի անունից Ղուրան էին նվիրել: Իր ելույթում Սիրիայի կրոնական գույքի հարցերով նախարար Աբդել Սիթեր Աս Սեիդը հայտարարել էր.<<Սիրիայի մուսուլման հոգևոր առաջնորդները աջակցում են Ռուսաստանին ահաբեկչության դեմ մղած պայքարում և շնորհակալություն են հայտնում նախագահ Վ. Պուտինին, Ռուսաստանի կառավարությանը, Զինված Ուժերին և ռուս ժողովրդին>>: Իսկ Սիրիայի գլխավոր մուֆթի Ահմադ Բադրեդին Հասսունը հայտարարել էր, որ Սիրիային ցուցաբերած Ռուսաստանի օգնությունը <<ստի նկատմամբ ճշմարտության հաղթանակն է>>: <<Սիրիայում ընթացող պատերազմը դա պատերազմ չի քրիստոնեության և իսլամի միջև: Այսօր Ռուսաստանը օգնում է սիրիացի ժողովրդին, որը պայքարում է միջազգային չարիքի` ահաբեկչության դեմ>>-հայտարարել էր Ահմադ Բադրեդին Հասսունը: Ռուսաստանի դեսպանատանը տեղի ունեցած ընդունելությանը ներկա սունի և շիա հոգևոր առաջնորդները հայտարարել էին, որ նման հանդիպումները շատ կարևոր են, քանի որ արևմտյան պետությունների ղեկավարները և բազմաթիվ լրատվամիջոցներ փորձում են Ռուսաստանի օգնությունը ներկայացնել, որպես քրիստոնեության և իսլամի դիմակայություն:Սիրիայի մուսուլման առաջնորդների խոսքով ճշմարիտ իսլամը դեմ է ահաբեկչությանը, իսկ Ռուսաստանի ռազմա-օդային ուժերի գործողությունները ուղղված են ոչ թե մուսուլմանների, այլ իսլամիստ ահաբեկիչների դեմ:
