Կամերունի հյուսիսում բանակի իրականացրած լայնամասշտաբ գործողությունների ժամանակ ոչնչացրել են <<Բոկո հարամ>> իսլամական խմբավորման ավելի քան100 գրոհայինների: Այս մասին տեղեկացրել է Կամերունի պաշտպանության նախարարությունը: Նախարարության տվյալներով Կամերունի բանակային ստորաբաժանումները հատուկ գործողություններ են իրականացրել Նիգերիայի հետ սահմանակից բնակավայրերը իսլամիստներից մաքրելու համար: Հենց այդ վայրերում են գրոհայինները ակտիվորեն գործում: Ազատագրել են գրոհայինների կողմից առևանգված շուրջ 900 մարդու: Բացի դա անվտանգության ուժերը բռնագրավել են մեծ թվով զենք ու զինամթերք, ինչպես նաև << Իսլամական պետություն >> խմբավորման դրոշներ: Նշենք, որ << Բոկո հարամ>> իսլամական խմբավորումը գործում է Նիգերիայի հյուսիսում և հյուսիս արևելքում: Խմբավորման գրոհայինները հարձակումներ են իրականացնում նաև հարևան երկրների` Նիգերի, Կամերունի և Չադի տարածքներում: << Բոկո հարամ>>-ը ձգտում է իսլամական խալիֆայություն ստեղծել և շարիաթի կանոնները տարածել Նիգերիայի ամբողջ տարածքում: Խմբավորումը դեմ է արևմտյան կրթությանը, դեմոկրատիային և իրենց մշակույթին օտար ամեն ինչին: Այս տարվա մարտին խմբավորումը հավատարմության երդում էր տվել <<Իսլամական պետություն>> խմբավորմանը:
