Anglican Communion News Service գործակալության տեղեկացմամբ` Իռլանդիայի մայրաքաղաք Դուբլինի Հիսուս Քրիստոսի անգլիկան տաճարի բակում կանգնեցրել են տուֆից պատրաստված հայկական ավանդական խաչքար, որը նվիրված է Հայոց ցեղասպանության զոհերի հիշատակին: Խաչքարի բացման և զոհերի հիշատակը հարգելու արարողությանը ներկա էին Իռլանդիայի քրիստոնեական բոլոր հարանվանությունների առաջնորդները`Դուբլինի անգլիկան եկեղեցու արքեպիսկոպոս Մայքլ Ջեքսոնը, Դուբլինի կաթոլիկ արքեպիսկոպոս Դայարմյուիդ Մարտինը, մեթոդիստական եկեղեցու նախագահ Բրայան Անդերսոնը և այլոք: Հուշարձան խաչքարը օծել էր մեծ Բրիտանիայում և Իռլանդիայում Հայ Առաքելական եկեղեցու թեմի առաջնորդ, եպիսկոպոս Հովակիմ Մանուկյանը: Խաչքարի էսքիզը կատարել էր Իռլանդիայում բնակվող հայ նկարիչ Արամ Հախումյանը: Խաչքարը քանդակել են Հայաստանում, որից հետո տեղափոխել Դուբլին: Նշենք, որ Դուբլինում տեղադրված խաչքարը Հայոց ցեղասպանության զոհերի հիշատակին նվիրված 167-րդ հուշարձանն է աշխարհում: Ներկայումս հայ նահատակների հիշատակի հուշարձաններ տեղադրված են 52 երկրներում:
