Christian Today-ի համաձայն`Ավստրալիայում քրիստոնեական տարբեր ծառայությունների և եկեղեցիների առաջնորդներ երկրի արդարադատության նախարարի գրասենյակում աղոթել էին` իրենց բողոքը հայտնելու 267 գաղթականների երկրից արտաքսելու կառավարության մտադրության դեմ: Այդ գաղթականներին բուժման նպատակով Ավստրալիա էին բերել Նաուրու կղզում գտնվող փախստականների ճամբարից: Արտաքսման ենթակա փախստականների մեջ 37-ը երեխաներ են, ովքեր ծնվել են Ավստրալիայում: Իրավապաշտպանների կարծիքով Նաուրու կղզում գտնվող փախստականների ճամբարում սեռական և ֆիզիկական բռնությունների են ենթարկում մարդկանց: Գաղթականներին ճամբար վերադարձնելու հարցը երկար ժամանակ քննարկվում է Ավստրալիայում: Մարդիկ բողոքում են կառավարության այդ մտադրության դեմ: Քրիստոնյա առաջնորդները արդարադատության նախարար Մայքլ Քինանի գրասենյակում հավաքվել էին <<Սերը ճանապարհ է հարթում>> շարժման շրջանակներում: << Ոչ ոք չպետք է պահվի Նաուրուի ճամբարում, որտեղ անգամ գործող հիվանդանոց չկա: Հատկապես դաժան է, որ Ավստրալիայում ծնված 37 երեխաների արտաքսում են երկրից>>-հայտարարել էր շարժման մամուլի քարտուղար Քեյթ Լինին`հիշեցնելով, որ իր առաջին ելույթում նախարար Քինանը հայտարարել էր հանդուրժողականության և ազատության կարևորության մասին: << Մենք այստեղ ենք հավաքվել, որպեսզի աղոթենք և պարոն Քինանին կոչ անենք պայքարել ճնշումներից մարդկանց ազատելու համար, ովքեր ապաստան են փնտրում Ավստրալիայում>>-ասել էր Քեյթ Լինին: Այդ ակցիայի ժամանակ ոստիկանությունը ձերբակալել էր քրիստոնյա 9 առաջնորդների և գրասենյակը ազատել էր բողոքի մասնակիցներից:
