Արաբալեզու << Լինգա>> կայքի տեղեկացմամբ մայիսի վերջերին Երուսաղեմում կայացել էր քրիստոնյա հրեաների կոնֆերանսը, որը նվիրված էր իսրայելյան հասարակությունում Ավետարանի քարոզչության հարցերին: Կոնֆերանսին մասնակցում էին կրոնական հեղինակավոր գործիչներ, այդ թվում հրեականությունից քրիստոնեության անցած հայտնի քարոզիչ Էֆի Միզրահին, <<Ավետարանչության հարցերով համաշխարհային կոմիտեի>> նախագահ Մորիս Սերիլլոն և այլոք: Քրիստոնեական այս կոնֆերանսի առիթով զանգվածային բողոքի ցույց էին կազմակերպել հրեականության աջ թևի ներկայացուցիչները: Արմատական այս հրեաները բողոքում էին Երուսաղեմում քրիստոնյաների և ընդհանրապես Իսրայելում քրիստոնեության ներկայության դեմ: Բողոքի մասնակիցները իշխանություններից պահանջում էին օրինականացնել մի շարք հակաքրիստոնեական միջոցառումներ` այդ թվում քրիստոնյաների բնակության տարածքների սահմանափակում և նրանց գործունեության հսկողության խստացում:<< Միշտ նազարեթցիները բնակվել են Նազարեթում: Իսկ հիմա մենք ինքներս ենք նրանց հնարավորություն տվել բնակվել Երուսաղեմում: Սա մեծ վիրավորանք է ամենակարող Աստծուն: Իսկ Երուսաղեմում անցկացվող այս կոնֆերանսը նման է Նաբուգոդոնոսորի կողմից Սուրբ Քաղաքը անարգելուն>>-հայտարարել էր րաբբի Էլիյահու Շլիցենգերը: Պետք է նշել, որ հակաքրիստոնեական այս ակցիային աջակցել էին Երուսաղեմի բազմաթիվ քաղաքական և հասարակական գործիչներ, րաբբիներ:
