<<Fides>>գործակալության տեղեկացմամբ` եգիպտացի ղպտի միլիոնատեր Նահիբ Սավիրիսը պատրաստ է անբնակ կղզի գնել Միջերկրական ծովում, որտեղ կարող են բնակվել փախստականները Մերձավոր Արևելքից և Աֆրիկայից: Նշենք, որ Նահիբ Սավիրիսը Եգիպտոսի ամենահարուստ գործարարներից մեկն է, ղեկավարում է <<Orascom Telecom Holding>> հեռահաղորդակցության ընկերությունը, որն ունի ավելի քան 50 միլիոն աբոնենտ ամբողջ աշխարհում: Վերջերս տված հարցազրույցում միլիոնատերը պատմել էր, որ նման որոշում է ընդունել, քանի որ շատ մտահոգ է գաթականների ոբերգական վիճակով: Նահիբ Սավիրիսը հայտնել է, որ կղզին կոչելու է վերջերս Միջերկրական ծովում խեղդված երեք տարեկան քուրդ տղայի` Այլան Քուրդիի անունով: Զոհված փոքրիկը դարձել է գաղթականների ողբերգության խորհրդանիշը: Ղպտի գործարարը նշել էր, որ կղզի գնելու խնդրանքով դիմելու է Հունաստանի և Իտալիայի կառավարություններին: Նա պատրաստ է այդ նպատակի համար ծախսել մինչև 100 միլիոն դոլար: Նա հույս ունի որ այդ կղզում գաղթականները ապաստան կգտնեն, իսկ հետագայում կզբաղվեն տների, հիվանդանոցների, դպրոցների շինարարությամբ:
