Հռոմում տեղի ունեցած քրեական հեղինակություններից մեկի հանդիսավոր թաղումը ցնցել է իտալական հասարակությանը: Քաղցկեղից 65 տարեկանում մահացած գնչուական մաֆիայի ղեկավար Վիտորիո Կազամոնիկի հոգեհանգստի արարողությունը կատարվել էր օգոստոսի 20-ին Հռոմի հարավային արվարձանում գտնվող սուրբ Հովհաննես Բոսկոյի տաճարում: Հասարակությունը ապշել էր արարողության շքեղությունից. ուղղաթիռից վարդի թերթիկներ էին թափում, նվագախումբը երաժշտություն էր նվագում <<Կնքահայրը>> ֆիլմից, դագաղը տանում էր սևաթույր վեց նժույգներով շքեղ կառքը, իսկ հրապարկում դրել էին հանգուցյալի մեծադիր նկարը: Նկարում Կազամոնիկին պատկերված է պարանոցից կախված խաչով , իսկ նկարի վրա գրված էր.<< Հռոմի արքա>>, <<Դու հաղթեցիր Հռոմին, հիմա կհաղթես դրախտը>>: Այս կապակցությամբ Հռոմի կաթոլիկ եպիսկոպոսությունը հայտարարել էր, որ եկեղեցու ներսում կատարվել էր սովորական արարողություն, իսկ արարողությունը կատարած քահանան ոչ մի պատկերացում չէր ունեցել թե ինչ է կատարվելու հրապարակում և ոչ մի հնարավորություն չէր ունեցել խանգարել դրան: Այս առնչությամբ <<Վատիկանի ռադիոյով>> ելույթ է ունեցել քահանա Լուիջի Չոտտին, ով հիմնադրել է << Լիբերա>> կազմակերպությունը, որի նպատակն է դիմակայել մաֆիային: Քահանան իր խոսքում խիստ քննադատության է ենթարկել հանցագործների կազմակերպած հանդիսավոր թաղումը այն համարելով պետությանը նետված հերթական մարտահրավերը: Չոտտին շեշտել էր, որ մաֆիան և Ավետարանը անհամատեղելի են և կոշտ քննադատության էր ենթարկել մահացած հանցագործի կեղծ կրոնականությունը: << Մենք դարձյալ բախվեցինք վտանգավոր իրականության հետ. կան մարդիկ, ովքեր օգտագործում են Աստծո անունը, օգտագործում են կրոնը իրենց նպատակների համար>>-ասել էր քահանա Լուիջի Չոտտին:
