Քենիայի նախագահ Ուհուրու Քենյատան հետմահու պարգևի է արժանացրել մուսուլման ուսուցիչ Սալահ Ֆարահին, ով զոհվել է` պաշտպանելով քրիստոնյաներին <<Աշ Շաբաբ>> խմբավորման գրոհայինների հրազենային կրակոցներից: : Նախորդ տարվա դեկտեմբերին Քենիայի Մանդերա քաղաքում իսլամիստները հարձակվել էին ավտոբուսի վրա, որում գտնվել էր Սալահ Ֆարահը: Գրոհայինները մուսուլման ուղևորներին կարգադրել էին առանձնանալ քրիստոնյաներից, սակայն մի քանի մուսուլման ուղևորներ, այդ թվում Ֆարահը, մերժել էին: Գրոհայինները կրակել էին և Սալահ Ֆարահը ծանր վիրավորվել էր: Նրան տեղափոխել էին Նայրոբիի հիվանդանոցներից մեկը, որտեղ էլ մեկ ամիս անց մահացել է: Ֆարահը 4 երեխաների հայր էր: Երկրի խորհրդարանում կայացած արարողության ժամանակ նախագահ Ուհուրու Քենյատան Ֆարահին արժանացրել է Քենիայի պետական բարձրագույն պարգևին քաջություն ցուցաբերելու համար: <<Սալահ Ֆարահը զոհվել է`պաշտպանելով անծանոթ մարդկանց: Սակայն նա կարծում էր, որ այդ մարդիկ հավատքի ազատության իրավունք ունեն և որ նրանց կյանքը շատ արժեքավոր է>>-ասել էր նախագահը: Մահից առաջ Ֆարահի հետ զրուցել էր BBC-ի լրագրողը >>: Լրագրողի այն հարցին, թե ինչու է իր կյանքը վտանգելով պաշտպանել քրիստոնյաներին, Ֆարահը ասել էր.<<Մարդիկ պետք է ապրեն միասին, խաղաղության մեջ:Մենք եղբայրներ ենք, ուղղակի մեր կրոններն են տարբեր: Ես խնդրում եմ իմ եղբայր մուսուլմաններին, որ հոգ տանեն քրիստոնյաներին, որպեսզի քրիստոնյաներն էլ հոգ տանեն մեզ համար: Պետք է օգնենք միմյանց և խաղաղ ապրենք>>:
