Հռոմի Պապը խստորեն դատապարտել է Անկարայում իրականացված արյունալի ահաբեկչությունը, որին զոհ է գնացել ավելի քան 100 մարդ: <<Մենք մեծ ցավով լսեցինք Անկարայում տեղի ունեցած սարսափելի արյունահեղության մասին: Ցավում ենք բազմաթիվ անմեղ զոհերի համար>>-ասել էր Պապը սուրբ Պետրոսի հրապարակում կիրակնօրյա ավանդական քարոզի ժամանակ: Պապը նշել էր, որ աղոթում է Թուրքիայի, ահաբեկչության բոլոր զոհերի, նրանց հարազատների համար և հրապարակում հավաքված հազարավոր հավատացյալներին կոչ էր արել իր հետ միաբանվել աղոթքում: Վատիկանի մամուլի ծառայության տեղեկացմամբ` Ֆրանցիսկ Պապի կարգադրությամբ Վատիկանի պետքարտուղար, կարդինալ Պիետրո Պարոլինը Թուրքիայի նախագահ Ռեջեփ Թաիփ Էրդողանին ցավակցական հեռագիր էր ուղարկել, որում կաթոլիկ Հովվապետը իր աջակցությունը և համերաշխությունն էր հայտնել թուրք ժողովրդին և դատապարտել բարբարոս այդ գործողությունը:
